ਨਿੱਜਰ ਜੱਟਾਂ ਦਾ ਇਕ ਛੋਟਾ ਜਿਹਾ ਗੋਤ ਹੈ । ਇਹ ਮੱਧ ਏਸ਼ੀਆ ਤੋਂ ਆਇਆ ਜੱਟਾਂ ਦਾ ਬਹੁਤ ਹੀ ਪੁਰਾਣਾ ਕਬੀਲਾ ਹੈ । ਨਿੱਜਰ ਗੋਤ ਨਾਲ ਰਲਦੇ- ਮਿਲਦੇ ਗੋਤ ਦੇ ਲੋਕ ਮੱਧ ਏਸ਼ੀਆ ਵਿੱਚ ਹੁਣ ਵੀ ਹਨ । ਨਿੱਜਰ ਜੱਟ ਜਮਨਾ ਦੇ ਪੂਰਬ ਵਲੋਂ ਦੁਆਬੇ ਵਿੱਚ ਆਏ । ਇਹ ਵੀ ਭੱਟੀ ਰਾਜਪੂਤਾਂ ਵਿਚੋਂ ਹਨ । ਮੁਹੰਮਦ ਗੌਰੀ ਦੇ ਹਮਲੇ ਸਮੇਂ ਪੰਜਾਬ ਵਿੱਚ ਖੋਖਰ, ਭੁੱਟੇ, ਲੰਗਾਹ, ਵਿਰਕ, ਛੀਨੇ, ਸਮਰੇ, ਵੜੇਚ ਤੇ ਨਿੱਜਰਾ ਆਦਿ ਜੱਟ ਕਬੀਲੇ ਆਬਾਦ ਸਨ । ਉਸ ਸਮੇਂ ਪੰਜਾਬ ਤਕੜੇ ਤੇ ਲੜਾਕੇ ਕ੍ਰਿਸਾਨ ਕਬੀਲਿਆਂ ਦਾ ਘਰ ਸੀ ।
ਪੰਜਾਬ ਵਿੱਚ ਬਹੁਤੇ ਨਿੱਜਰ ਗੋਤ ਦੇ ਲੋਕ ਦੁਆਬੇ ਦੇ ਜਲੰਧਰ ਤੇ ਕਪੂਰਥਲਾ ਆਦਿ ਖੇਤਰਾਂ ਵਿੱਚ ਆਬਾਦ ਹਨ । ਨਵਾਂ ਸ਼ਹਿਰ ਦੇ ਨੇੜੇ ਵੀ ਕੁਝ ਨਿੱਜਰ ਆਪਣੇ ਨਿੱਜਰ ਫਾਰਮ ਬਣਾਕੇ ਖੇਤਾਂ ਵਿੱਚ ਰਹਿੰਦੇ ਹਨ । ਪੰਜਾਬ ਵਿੱਚ ਨਿੱਜਰ ਨਾਮ ਦੇ ਕਈ ਪਿੰਡ ਹਨ। ਜਲੰਧਰ ਜ਼ਿਲ੍ਹੇ ਵਿੱਚ ਵੀ ਇੱਕ ਪਿੰਡ ਦਾ ਨਾਮ ਨਿੱਜਰ ਹੈ । ਜਲੰਧਰ ਵਿੱਚ ਪੰਡੌਰੀ ਨਿਝਰਾਂ ਬਹੁਤ ਪ੍ਰਸਿੱਧ ਪਿੰਡ ਹੈ । ਨਿੱਜਰ ਦੇ ਨਿੱਝਰ ਇਕੋ ਗੋਤ ਹੈ । ਪੰਜਾਬ ਦੇ ਪ੍ਰਸਿੱਧ ਇਤਿਹਾਸਕਾਰ ਡਾਕਟਰ ਬਖਸ਼ੀਸ ਸਿੰਘ ਨਿੱਜਰ ਦਾ ਪਿੰਡ ਡੁਮੇਲੀ ਫਗਵਾੜੇ ਦੇ ਨਜ਼ਦੀਕ ਕਪੂਰਥਲੇ ਜ਼ਿਲ੍ਹੇ ਵਿੱਚ ਹੈ । ਇਸ ਪਿੰਡ ਵਿੱਚ ਵੀ ਨਿੱਜਰ ਜੱਟ ਕਾਫੀ ਹਨ ।
ਇਕ ਨਿੱਜਰਾਂ ਪਿੰਡ ਅੰਮ੍ਰਿਤਸਰ ਜ਼ਿਲ੍ਹੇ ਵਿੱਚ ਵੀ ਹੈ । ਅਜਨਾਲੇ ਦੇ ਨਜ਼ਦੀਕ ਵੀ ਨਿੱਜਰਾਂ ਦੇ ਦੋ ਪਿੰਡ ਹਨ । ਫਿਰੋਜ਼ਪੁਰ ਜ਼ਿਲ੍ਹੇ ਦੇ ਜਲਾਲਾਬਾਦ ਖੇਤਰ ਵਿੱਚ ਵੀ ਪਾਕਿਸਤਾਨ ਤੋਂ ਆਏ ਹੋਏ ਨਿੱਜਰ ਜੱਟ ਕਈ ਪਿੰਡਾਂ ਵਿੱਚ ਆਬਾਦ ਹਨ । ਹਰਿਆਣੇ ਦੇ ਸਿਰਸਾ ਤੇ ਰਾਣੀਆਂ ਖੇਤਰ ਵਿੱਚ ਵੀ ਕੁਝ ਨਿੱਜਰ ਜੱਟ ਵਸਦੇ ਹਨ । ਪੱਛਮੀ ਪੰਜਾਬ ਵਿੱਚ ਕੁਝ ਨਿੱਜਰ ਜੱਟ ਮੁਸਲਮਾਨ ਬਣ ਗਏ ਸਨ ।
ਬਹੁਤੇ ਨਿੱਜਰ ਜੱਟ ਹਨ । ਕੁਝ ਸੁਨਿਆਰੇ ਤੇ ਖੱਤਰੀ ਵੀ ਹਨ । ਪੂਰਬੀ ਪੰਜਾਬ ਵਿੱਚ ਸਾਰੇ ਨਿੱਜਰ ਜੱਟ ਸਿੱਖ ਹੀ ਹਨ । ਦੁਆਬੇ ਦੇ ਬਹੁਤੇ ਨਿੱਜਰ ਅਮਰੀਕਾ ਤੇ ਕੈਨੇਡਾ ਆਦਿ ਦੇਸ਼ਾਂ ਵਿੱਚ ਜਾਕੇ ਆਬਾਦ ਹੋ ਗਏ ਹਨ । ਨਿੱਜਰ ਗੋਤ ਦੇ ਜੱਟ ਬਹੁਤ ਹੀ ਮਿਹਨਤੀ, ਸੰਜਮੀ ਤੇ ਸਿਆਣੇ ਹਨ ।
